خاتون سمیت 3افرادکی لاشیں ملیں

کراچی (اسٹاف رپورٹر) مختلف علاقوں میں سے خاتون سمیت 3 افراد کی لاشیں ملیں۔ تفصیلات کے مطابق منگھوپیر کےحاجی گل محمد گوٹھ کی جھاڑیوں سے خاتون کی پھندا لگی تشدد زدہ لاش ملی ، جسے پولیس نے اسپتال منتقل کیا۔ پولیس کے مطابق خاتون کے ہاتھ بندھے ہوئے تھے اور اس کے جسم پر تشدد کے نشانات کے علاوہ گلے میں پھندا پڑا ہوا ہے۔ مقتولہ کی عمر35سے40برس کے درمیان ہے۔ پولیس نے کارروائی کے بعد لاش سرد خانے منتقل کردی۔ تیسر ٹاؤن لیاری آفس کے قریب 60سالہ قمرالدین ولد شمس الدین کی لاش برآمد ہوئی ، جسے پولیس نے عباسی شہید اسپتال پہنچایا۔ پولیس کے مطابق وجہ موت کے حوالے سے تفتیش جاری ہے۔ رضاکاروں کے بقول لاش پر تشدد اور چوٹ کے نشانات ہیں تاہم اسکی تصدیق میڈیکل رپورٹ کے بعد ہوگی۔ سائٹ سپر ہائی وے کی عبداللہ مارکیٹ سے 45سالہ محمد یاسین ولد غلام محمد کی لاش ملی۔ ڈاکٹروں کا کہنا ہے کہ فوری طور پر وجہ موت معلوم نہیں ہو سکی ہے پوسٹ مارٹم رپورٹ آنے پر حقائق سامنے آئیں گے۔