پنجاب میں تباہی پھیلانے کا منصوبہ ناکام۔بہاولپورسے 5 دہشتگردگرفتار

بہاولپور(امت نیوز۔خبرایجنسیاں)کاؤنٹر ٹیررازم ڈیپارٹمنٹ (سی ٹی ڈی) نے بہاولپور میں دہشت گردی کا منصوبہ ناکام بنادیا، کالعدم تنظیم کے 5 دہشت گرد گرفتار کرلئے گئے۔سی ٹی ڈی کے مطابق خفیہ اطلاع پر تھانہ صدر کے علاقے میں کارروائی کی گئی اور 5 دہشت گردوں کو گرفتار کرلیا گیا، ملزمان بہاولپور میں انٹیلی جنس اداروں پر حملے کی منصوبہ بندی کررہے تھے۔حکام کے مطابق گرفتار دہشت گردوں کے قبضے سے خودکش جیکٹ، دستی بم، ڈیٹونیٹرز، اسلحہ اور بھاری رقم بھی برآمد ہوئی ہے، ملزمان کا تعلق کالعدم تحریک طالبان پاکستان سے ہے۔سی ٹی ڈی کے مطابق ملزمان کچھ عرصہ قبل القاعدہ برصغیر میں شامل ہوئے تھے اور جنوبی پنجاب میں دہشت گرد کارروائیوں کے ذریعے امن و امان کی صورتحال خراب کرنا چاہتے تھے۔