ملیر – وسطی سے لاکھوں کی چھالیہ و گٹکا برآمد – 5 گرفتار

کراچی (اسٹاف رپورٹر) پولیس اور رینجرز کارروائیوں کے دوران ضلع ملیر، وسطی اور دیگر علاقوں سے لاکھوں کی اسمگل شدہ چھالیہ اور گٹکا برآمد کرکے 5گٹکا فروشوں سمیت 19 اسمگلروں، منشیات فروشوں اور دیگر ملزمان کو گرفتار کرلیا گیا، ملزمان سے بھاری مقدار میں منشیات اور دیگر مسروقہ سامان بھی ملا ہے۔ تفصیلات کے مطابق ملیر پولیس نے چھالیہ اور مضر صحت گٹکا کی سپلائی ناکام بناتے ہوئے 3 ملزمان خالد، روشن اور اعجاز کو گرفتار کرکے ان سے لاکھوں روپے مالیت کی 1100کلو گرام چھالیہ اور کئی اقسام کے تیار گٹکے کی 7 بوریاں اور سوزوکی مزدا برآمد کرلی۔ پولیس کا کہنا ہے کہ ملزمان کارخانے میں گٹکا تیار کرنے کے بعد مختلف علاقوں میں سپلائی کرتے تھے۔ ملزمان کئی سال سے گٹکا سپلائی کررہے تھے۔ ایک اور کارروائی میں وومن پولیس اسٹیشن سینٹرل نے قاسم آباد ٹمبر مارکیٹ میں مین پوری کے کارخانہ پر چھاپہ مار کر 2ملزمان کو گرفتار کرلیا اور ان سے بھاری مقدار میں مین پوری برآمد کرلی۔ کارخانے سے چھالیہ کی متعدد بوریاں بھی ملی ہیں۔ آپریشن خفیہ اطلاع پر ایس ایچ او عظمیٰ خان کی سربراہی میں خواتین اہلکاروں کی ٹیم نے کیا۔ ملزم عدنان اور احمد سے تفتیش شروع کردی گئی۔ رینجرز نے اسٹیل ٹاؤن سے رینجرز اہلکار الیاس کےقتل سمیت ڈکیتی اور اسٹریٹ کرائم کی متعدد وارداتوں میں ملوث ملزم احسان عرف سنی عرف پتی کو گرفتار کیا۔اس علاقے میں رینجرز نے ملزم کاشف ، اعجاز عرف اجو اور شہزاد کو گرفتار کرلیا جو مسروقہ موبائل فونز کی خریدو فروخت ، ڈکیتی اور اسٹریٹ کرائم کی متعدد وارداتوں میں ملوث ہیں۔ میمن گوٹھ پولیس اور رینجرز نے غفور بستی میں 4مشتبہ افراد کو حراست میں لے لیا، جن سے تفتیش کی جارہی ہے۔ اسٹیل ٹاؤن پولیس نے 14مشتبہ افراد کو حراست میں لیا، جن میں11کو کوائف کی تصدیق کے بعد رہا کر دیا گیا، جبکہ 3 ملزمان شہزاد، اعجاز اور کاشف سے منشیات برآمد کرکے مقدمہ درج کر لیا گیا ہے۔ سائٹ سپرہائی وے پولیس نے مقابلے کے بعد ملزم اللہ بچایو اور بلال کو گرفتار کرکے اسلحہ برآمد کرلیا، ملزمان موبائل ٹاور میں ڈکیتی کررہے تھے کہ اطلاع ملنے پر پولیس نے انہیں دھرلیا۔ بلال کالونی پولیس نے ملزم شاہد کو گرفتار کرکے اس سے70کلو گرام گٹکا برآمد کرلیا۔ گلستان جوہر پولیس نے ملزم فیضان کو گرفتار کرکے منشیات برآمد کرلی۔ کورنگی پولیس نے لنک روڈ پر کارروائی کرکے ملزم عدنان کو گرفتار کرکے اس سے مسروقہ موٹر سائیکل برآمد کرلی۔ چاکیواڑہ پولیس نے ملزم کامران بشیر کو گرفتار کرکے اس سے اسلحہ برآمد کرلیا۔لیاقت آباد پولیس نے ملزم فہد اور عبدالکلام کو گرفتار کرکے اسلحہ برآمد کرلیا۔ بلال کالونی پولیس نے ملزم فیصل کو گرفتار کرکے مسروقہ موٹر سائیکلیں برآمد کرلیں۔ مبینہ ٹاؤن پولیس نے ملزم عبدالحکیم کو گرفتار کرکے منشیات برآمد کرلی۔