گینگ وار کارندے-اغوا کار و خاتون منشیات فروش سمیت 26 گرفتار

کراچی (اسٹاف رپورٹر) رینجرز اور پولیس آپریشن میں گینگ وار کارندے، اغوا کار اور خاتون منشیات فروش سمیت 26 ملزمان کو گرفتار کرکے اسلحہ، منشیات اور مغوی بچے کو بازیاب کرالیا۔ تفصیلات کے مطابق رینجرز نے اسٹیل ٹاؤن میں کارروائی کرتے ہو ئے ملزم اسامہ علی کو گرفتار کیا جو کہ گینگ وار کارندہ اور ٹارگٹ کلنگ و بھتہ خوری میں ملوث ہے۔ مدینہ کالونی، بلدیہ ٹاؤن، اتحاد ٹاؤن میں رینجرز نے ڈکیتی و اسٹریٹ کرائم میں ملوث 3 ملزمان جبار، فیضان، احسان کو گرفتار کرلیا۔ قائد آباد پولیس نے بچے کے اغوا میں ملوث ملزم مراد کو گرفتار کرکے 7 سالہ زین ولد نذیر احمد کو بازیاب کرالیا۔ شاہ لطیف پولیس نے چوری کی وارداتوں میں ملوث ملزم اختر اور الیاس کو گرفتار کرکے لاکھوں کا مسروقہ سامان برآمد کرلیا، ملزمان شاہ لطیف میں دکانوں کے تالے کاٹ کر چوریاں کرتے تھے۔ سائٹ اے پولیس نے ملزم نادر کو گرفتار کرکے اسلحہ برآمد کرلیا۔ ابراہیم حیدری پولیس نے ہوئے خاتون منشیات فروش عزت خان کو گرفتار کرکے منشیات برآمد کرلی۔ درخشاں پولیس نے شیشہ بار پر کارروائی کرتے ہوئے 4 ملزمان علی شاہ، منظور شاہ، امین اور قدیر کو گرفتار کرکے ان سے شیشہ حقے اور مختلف فلیورز برآمد کرلئے، جبکہ دوسری کارروائی کے دوران ملزم ذیشان کو گرفتار کرکے اسلحہ برآمد کیا گیا ۔ اسی طرح دیگر علاقوں میں پولیس کاررووائیوں کے دوران 17 جرائم پیشہ اور اسٹریٹ کرنمنلز کو حراست میں لیا گیا ہے۔