کوسٹر میں آگ لگنے سے3افرادزخمی-اسٹیڈیم اور مکان کا اسٹور جل گیا

کراچی (اسٹاف رپورٹر) اسٹیل ٹاؤن میں کوسٹر میں آگ لگنے سے 3 افراد جھلس گئے، لیاری میں فٹبال اسٹیڈیم کے اسٹور میں آگ لگنے سے پرانا سامان جل گیا،جبکہ مکان کے اسٹور میں آتش زدگی سے پرانا سامان جل گیا۔ تفصیلات کے مطابق اسٹیل ٹاؤن کے علاقے نیشنل ہائی وے جناح پارک کے سامنے جمعے کی سہ پہر ڈیڑھ بجے اچانک ایک کوسٹر میں آگ بھرک اٹھی، جسے دیکھ کر شہری جمع ہو گئے اور مسافروں کو باہر نکال لیا، تاہم 3 افراد معمولی جھلس گئے، جنہیں اسپتال منتقل کیا گیا۔ اطلاع ملنے پر فائر بریگیڈ کی 2 گاڑیاں پہنچ گئیں اور ایک گھنٹے کی جدوجہد کے بعد آگ بجھا دی۔ ترجمان نے کہا کہ کوسٹر مکمل جل گئی جبکہ آگ شارٹ سرکٹ سے لگی تھی۔ ادھر پیپلز فٹبال اسٹیڈیم لیاری کے اسٹور میں جمعے کی صبح اچانک آگ بھڑک اٹھی، جس کی اطلاع پر ایک گاڑی نے آگ پر فوری قابو پالیا۔ ترجمان نے کہا کہ اسٹور میں موجود پرانا سامان جل گیا ،جبکہ آگ کی وجہ معلوم نہ ہوسکی۔ لیاری کے علاقے بغدادی میں مکان کے اسٹور میں رکھے سامان میں اچانک آگ بھڑک اٹھی۔ اطلاع ملنے پر فائر بریگیڈ کی ایک گاڑی نے پہنچ کر آگ پر قابو پالیا۔ فائر بریگیڈ ترجمان کا کہنا ہے کہ آگ سے پرانا سامان جل گیا، تاہم کوئی جانی نقصان نہیں ہوا۔