تیز رفتار گاڑیوں کی ٹکر سے 2 دوستوں سمیت 4 افراد ہلاک
کراچی(اسٹاف رپورٹر) تیز رفتار گاڑیوں کی ٹکر سے 2 دوستوں سمیت 4 افراد ہلاک ہوگئے، جب کہ موٹر سائیکل اور ٹھیلے کے تصادم میں نوجوان چل بسا۔سائٹ میں رکشہ الٹنے کے نتیجے میں باپ اور 4 بچے زخمی ہوگئے۔تفصیلات کے مطابق سائٹ بی کے علاقے بشیر اینڈ سنز کے قریب گاڑی کی ٹکر سے موٹر سائیکل پر سوار 2 نوجوان موقع پر ہلاک ہوگئے ۔ پولیس کا کہنا ہے کہ اسپتال میں دونوں کی شناخت 22 سالہ سروت ولد بوٹا رام اور 20 سالہ نفیس کے نام سے ہوئی ۔دونوں نوجوان کسی کام کے سلسلے میں نکلے تھے کہ مذکورہ مقام پر حادثے کا شکار ہوئے۔ منگھوپیر کے علاقے ایم پی آر کالونی کے قریب گاڑی کی ٹکر سے 30 سالہ جمیل احمد ولد گل احمد جاں بحق ہوگیا۔ موچکو کے علاقے لکی چڑھائی کے قریب گاڑی کی ٹکر سے 28 سالہ محمد یامین ولد علی نواز جاں بحق ہوگیا۔سچل کے علاقے صفورا چورنگی چیپل سن سٹی کے قریب موٹر سائیکل اور ٹھیلے میں تصادم کے نتیجے میں 2 افراد زخمی ہوگئے، جن میں سے 17 سالہ نامعلوم نوجوان چل بس،جب کہ زخمی کی شناخت 55 سالہ منور ولد بشیر کے نام سے ہوئی ہے۔ ادھر سائٹ بی کے علاقے ہنڈا کمپنی کے قریب رکشہ الٹنے سے 5 افراد 35 سالہ شیر محمد ولد حسن شاہ، اس کی 3 بیٹیاں 12 سالہ کومل ، 9 سالہ کنول ، 4 سالہ حلیمہ اور بیٹا 6 سالہ عرفان زخمی ہوگئے۔
