رینجرز نےکورنگی سے 3بھتہ خور اسلحہ سمیت پکڑ لئے

کراچی (اسٹاف رپورٹر) رینجرز نے کورنگی میں سنار سےبھتہ مانگنے والے 3 ملزمان کو گرفتارکرکے اسلحہ برآمد کرلیا۔تفصیلات کے مطابق پاکستان رینجرز (سندھ)نے کورنگی میں کارروائی کرتے ہوئے 3ملزمان محمد ثاقب ولد محمد عابد ،طلحہ ولد محمد عابد اور ثاقب ولد عاص محمد پر مشتمل بھتہ خور گروہ کو گرفتار کرلیا، ابتدائی تفتیش کے مطابق ملزمان رواں ماہ کی 5تاریخ کو کورنگی نمبر 6میں تسلیم نامی سنار کی کار پرفائرنگ کر تے ہوئے فرار ہو گئے، جس کے نتیجے میں سنارکی کار پر2 گولیاں بھی لگیں۔واقعے کے بعد ملزمان نے 8دسمبر کو تسلیم کو فون کر کے 2کروڑ روپے بھتہ مانگا اورنہ دینے پرسنگین نتائج کی دھمکی دی۔ بھتے کیلئے مسلسل کالیں آنے پر تسلیم نےرینجرز کو شکایت درج کروائی کہ نا معلوم افراد 2کروڑ بھتہ مانگ رہے ہیں اورمارنے کی دھمکیاں بھی دے رہے ہیں، شکایت ملنے پررینجرز نے تحقیقات کیں اور کارروائی کرتے ہوئے ملوث ملزمان کو اسلحہ اورگولہ بارود سمیت گرفتار کرلیا۔ ملزمان سے تفتیش کی جارہی ہے ۔