اسلامی سکوک بانڈ جاری کرنے کا فیصلہ

اسلام آباد(مانیٹرنگ ڈیسک)وفاقی حکومت نے مشکل معاشی صورت حال سے نمٹنے اور زرمبادلہ کے گرتے ذخائر کو سہارا دینے کے لیے اسلامک سکوک بانڈ جاری کرنے کا فیصلہ کیا ہے۔وزیر خزانہ اسد عمر کی زیر صدارت اسلام آباد میں اجلاس ہوا جس میں اسلامک بینکوں کے نمائندوں نے شرکت کی۔ اجلاس میں اسلامک سکوک بونڈ جاری کرنے کا فیصلہ کیا گیا۔اسلامک بینکوں کے کنسورشیئم کی بریفنگ میں بتایا گیا کہ سکوک بونڈ کے اجراء کیلئے تیاریاں پہلے ہی مکمل کرلی گئی ہیں اور اس حوالے سے معمولی رکاوٹیں ہیں جو جلد دور کرلی جائیں گی۔سکوک بانڈ توانائی کے شعبہ کےلیے جاری کیے جائیں گے اور قریباً 300ارب روپے کے سکوک بانڈ جاری کیے جا سکتے ہیں، سکوک بانڈ سے حاصل رقم سے گردشی قرضوں کی ادائیگیاں کی جائیں گی۔وزیر خزانہ نے اسلامی بینکوں کو سکوک بونڈ جاری کرنے کے لیے ہر ممکن مدد کی یقین دہانی کرائی ہے۔