میتھیوز کا کیویز کو ہوم گراؤنڈ میں ہرانے کا عزم

کرائسٹ چرچ (امت نیوز) سری لنکن کرکٹ ٹیم کے مایہ ناز آل رائونڈر انجیلو میتھیوز نے کہا ہے کہ کیویز کو دوسرے اور آخری ٹیسٹ میچ میں شکست دیکر سیریز 1-0 سے اپنے نام کرینگے۔ انہوں نے کہا کہ وہ کیویز کے خلاف پہلے میچ میں اپنی کارکردگی سے مطمئن ہیں۔ انہوں نے کہا کہ وہ دوسرے اور فیصلہ کن ٹیسٹ میچ میں بھی اپنی کارکردگی کے تسلسل کو برقرار رکھتے ہوئے اپنی ٹیم کی فتح میں اہم کردار ادا کرینگے۔ اپنے ایک بیان میں انہوں نے کہا کہ ہار جیت کھیل کا حصہ ہے، میزبان ٹیم کو دوسرے میچ میں شکست دیکر سیریز اپنے نام کرینگے۔ انہوں نے کہا کہ وہ مکمل طور پر فٹ اور بھر پور فارم میں ہیں۔ انجیلو میتھیوز نے کہا کہ انکی ٹیم متحد ہے اور کیویز کے خلاف دوسرے ٹیسٹ میچ کے لئے میدان میں اترنے کو بے تاب ہے۔ نیوزی لینڈ اور سری لنکا کے درمیان دو میچوں کی سیریز کا پہلا میچ ہار جیت کے فیصلے کے بغیر ہی ختم ہوگیا تھا۔ انہوں نے کہا کہ ابتدائی میچ میں کیویز ٹیم نے بہت اچھا کھیل پیش کیا تھا۔
٭٭٭٭٭