تیز رفتار گاڑیوں نے چچا بھتیجے- بچے سمیت 6افراد کو روند ڈالا
کراچی (اسٹاف رپورٹر) شہر کے مختلف علاقوں میں تیز رفتار گاڑیوں نے چچا بھتیجے اور بچے سمیت 6افراد کو روند ڈالا جبکہ ٹرین کی زد میں آکر ایک شخص جاں بحق ہوگیا۔ تفصیلات کےمطابق ڈیفنس فیز8خیابان شجاعت کے الیکٹرک دفتر کے قریب نامعلوم گاڑی کی ٹکر سے 2افراد جاں بحق ہوگئے۔متوفی 24سالہ وقاص ولد رفیق اور 48سالہ عباس ولد کالا خان آپس میں چچا بھتیجے اور قیوم آباد کے رہائشی ہیں۔ ڈاکس کے علاقے نیٹی جیٹی پل پر نامعلوم گاڑی کی ٹکر سے 45سالہ جمال ولد سید فضل علی جاں بحق ہوگیا،متوفی مچھر کالونی کا رہائشی تھا۔ سہراب گوٹھ کے علاقے سپرہائی وے الآصف اسکوائر کے قریب نامعلوم گاڑی کی ٹکر سے 55سالہ عبداللہ ولد ناصر جاں بحق ہوگیا، متوفی ابوالحسن اصفہانی روڈ کا رہائشی تھا۔ قائد آباد میں ٹرین کی زد میں آکر30سالہ غلام حسین ولد عبدالقادر جاں بحق ہوگیا، متوفی لاڑکانہ کا رہائشی تھا۔ بوٹ بیسن کے علاقے بلاول چورنگی کے قریب تیز رفتار گاڑی کی ٹکرسے 8سالہ محمد فیضان ولد عبدالرزاق جاں بحق ہوگیا۔ پولیس کے مطابق متوفی سڑک عبور کررہا تھا کہ تیز رفتار گاڑی اسے روند کر فرار ہوگئی۔ کورنگی کے علاقے کورنگی سنگر چورنگی کے قریب نامعلوم گاڑی کی ٹکرسے موٹر سائیکل سوار18سالہ محمد نظام جاں بحق ہوگیا، متوفی کورنگی کا رہائشی تھا۔
