گھروں میں ڈکیتیاں کرنیوالی ماسی سمیت 3ملزم پکڑے گئے

کراچی(اسٹاف رپورٹر)گلشن پولیس نے گھروں میں کام کے دوران اپنے ساتھیوں کی مدد سے لوٹ مار کرنے والی ماسی سمیت 3ملزمان کو گرفتار کرکے لوٹی ہوئی رقم اور طلائی زیورات برآمد کرلیے، جبکہ ملزمان کے 3ساتھی فرار ہوگئے، جن میں بھی ایک خاتون شامل ہے۔تفصیلات کے مطابق گلشن پولیس نے گھروں میں ڈکیتیاں کرنے والے 3ملزمان کو گرفتار کرلیا، جب کہ ان کے 3ساتھی فرار ہوگئے ۔پولیس کا کہنا ہے کہ ملزمان گلشن اقبال بلاک 3میں واقع ایک بنگلے میں داخل ہوئے اور اسلحہ کے زور پر 6لاکھ روپے سے زائد نقدی اور طلائی زیورات لوٹ کر فرار ہورہے تھے کہ اطلاع ملتے ہی پولیس پہنچ گئی اور خاتون ممتاز بی بی ، اس کے 2ساتھیوں آصف اور ندیم کو گرفتار کرلیا، جبکہ ملزمان کے 3ساتھی فرار ہوگئے ، جن میں بھی ایک خاتون شامل ہے ۔گرفتار ملزمہ ممتاز بی بی مذکورہ بنگلے میں ماسی کا کام کرتی تھی۔اس نے اپنے ساتھیوں کے ساتھ مل کر واردات کی منصوبہ بندی کی تھی، جس کے تحت وہ ساتھیوں کے ساتھ واردات کے لیے پہنچی اور لوٹ مار کے بعد ملزمان فرار ہورہے تھے کہ پولیس نے پہنچ کر 3کو گرفتار کرکے نقدی اور زیور برآمد کرلیے ہیں۔