گھر کا چھجہ گرنے سے ماں 2 بیٹیاں جاں بحق- بیٹا زخمی

سانگھڑ (نمائندہ امت) سانگھڑ کے قریب زیر تعمیر گھر کا چھجا گرنے سے ماں 2 بیٹیوں سمیت جاں بحق اور بیٹا زخمی ہو گیا۔ افسوسناک واقعہ سانگھڑ کے نواحی علاقے گھنڈن میں پیش آیا جہاں پر گھر کے افراد ناشتہ کرنے میں مصروف تھے۔ تفصیلات کے مطابق سانگھڑ سے 8 کلومیٹر دور گاؤں گھنڈن میں الصبح ایک افسوسناک واقعہ پیش آیا ایک زیر تعمیر گھر میں اہل خانہ ناشتہ کر رہے تھے کہ اچانک زیر تعمیر دیوار کا لینٹر جو کہ سیمنٹ سے بنا ہوا تھا ان پر گر پڑا، جس کے نتیجے میں ایک خاتون بھاگ بھری زوجہ امیر بخش اور اس کی دو بیٹیاں7سالہ گلشن 13سالہ گلشاہ موقع پر ہی جاں بحق ہو گئیں جبکہ بیٹا گلزار چانگ سخت زخمی ہو گیا، جسے علاج کے لیے سول اسپتال سانگھڑ لایا گیا، بتایا گیا ہے کہ گھر زیر تعمیر تھا اور دیوار کے سیمنٹ کے لینٹر کو چند روز قبل تعمیر کیا گیا تھا کہ وہ گر پڑا افسوسناک واقعہ نے گاؤں کے ہر شخص کو دکھی کر دیا، واقعے کی اطلاع ملنے پر فنکشنل مسلم لیگ کے رہنما خلیفہ وریام فقیر خاصخیلی متاثرہ خاندان کے پاس پہنچے اور دلی ہمدردی کا اظہار کرتے ہوئے ہر ممکن تعاون کا یقین دلایا۔