12 ویں ڈی جی رینجرز قومی اسکواش چیمپئن شپ طیب اسلم نے جیت لی

کراچی(اسپورٹس رپورٹر) ٹاپ سیڈ و دفاعی چیمپئن طیب اسلم نے 12 ویں ڈی جی رینجرز سندھ قومی اسکواش چیمپئن شپ کے مینزایونٹ میں اپنے اعزاز کا دفاع کیا،فائنل میں طیب نےسیڈ5 عماد فرید کو دلچسپ مقابلے کے بعد 1-3 سے شکست دی۔سیڈ 6 مقدس اشرف نے روشنا محبوب کو ایک گیم کی قربانی دے کر ویمنز ایونٹ اپنے نام کرلیا۔ 12 ویں ڈی جی رینجرز سندھ قومی اسکواش چیمپئین رینجرز جہانگیر خان اسکواش کمپلیکس، نارتھ ناظم آباد پر اختتام پزیر ہوگئی۔ڈی جی رینجرز سندھ میجر جنرل محمد سعید مہمان خصوصی تھے۔ 12 ہزار ڈالرز کی مالیت کے مینز ایونٹ میں ٹاپ سیڈ ایس این جی پی ایل کے طیب اسلم سنسنی خیز فائنل میں اپنے ہی ادارے کے عماد فرید کو ہراکر ٹائٹل کا دفاع کرنے میں کامیاب رہے،انہوں نے 9-11 سے فتح حاصل کی، دوسری جانب 3 ہزار ڈالرز کی انعامی ویمنز ایونٹ کے فائنل میں سیڈ6 واپڈا کی مقدس اشرف نے زیڈ ٹی بی ایل کی ان سیڈڈ کھلاڑی روشنامحبوب کو 25 منٹ کے مقابلے میں 1-3 سے پچھاڑ دیا، مقدس نے فائنل میں 5-11،5-11، 11-3 اور 8-11سے کامیابی حاصل کی ،آخر میں مہمان خصوصی نے کامیاب کھلاڑیوں میں انعامات تقسیم کیے۔ سابق عالمی چیمپئین جہانگیر خان، سندھ اسکواش ایسوسی ایشن کے سیکریٹری راشد احمد، سراج قاسم تیلی و دیگر بھی موجود تھے۔