بھارتی گٹکے۔چھالیہ کی بڑی کھیپ کراچی اسمگل کرنے کی کوشش ناکام

حب(نمائندہ امت)سی آئی اے پولیس نے ساکران میں کارروائی کرتے ہوئے بھارتی گٹکے اور چھالیہ کی بڑی کھیپ کراچی اسمگل کرنے کی کوشش ناکام بناتے ہوئے 2 اسمگلروں کو گرفتار کرلیا۔سی آئی اے انچارج انسپکٹر نور اسلام نے خفیہ اطلاع پر ساکران کے ایک باغ میں کارروائی کرتے ہوئے المعروف مسافر کوچ کمپنی کی المحمود کوچ کے خفیہ خانوں سے 103بوری بھاری گٹکا اور 222بوریاں چھالیہ برآمد کرکے 2اسمگلرز مولا داد اور جنید کو گرفتار کرلیا۔پولیس کے مطابق برآمد گٹکا اور چھالیہ کوئٹہ سے کراچی اسمگلنگ کیا جارہا تھا کہ سی آئی اے پولیس نے کوشش ناکام بنا دی۔سی آئی اے کے مطابق گٹکا اور چھالیہ کی مالیت کروڑوں روپے بتائی جاتی ہے۔ایک اور کارروائی میں ملزم یوسف کو گرفتار کرکے موٹرسائیکل برآمد کرلی گئی ، جو ملیر سے چھینی گئی تھی۔