گودھرا کالونی میں خوفناک آتشزدگی سے 6 گودام جل گئے

کراچی(اسٹاف رپورٹر)نیو کراچی گودھرا کالونی میں خوفناک آتشزدگی کے نتیجے میں 6 گودام جل گئے، جس میں لاکھوں کا نقصان ہوا۔ فائربریگیڈ کی 6گاڑیوں نے 6گھنٹے کی جدوجہد کے بعد آگ پر قابو پالیا۔تفصیلات کے مطابق نیو کراچی کے علاقے گودھرا کالونی سیکٹر 11E فاطمہ جناح کالونی کی مرکزی سڑک پر قائم لکڑیوں کے ایک گودام میں جمعہ و ہفتے کی درمیانی شب 3 بجے اچانک آگ بھڑک اٹھی،جس کے شعلوں اور دھوئیں کے بادل سے علاقے میں خوف و ہراس پھیل گیا۔اطلاع ملتے ہی پولیس ، رینجرز نفری اور فائر بریگیڈ کی 2گاڑیاں پہنچ گئیں۔ اس دوران آگ نے شدت اختیار کرتے ہوئے قریب واقع لکڑی کے 3 گوداموں اور لوہے کے سامان کے 2 گوداموں کو بھی لپیٹ میں لے لیا۔فائر بریگیڈ کی 6گاڑیوں نے 6گھنٹے کی جدوجہد کے بعد آگ پر قابو پالیا۔ترجمان نے کہا کہ ٓگ لگنے سے گوداموں میں موجود لاکھوں روپے مالیت کی لکڑی اور دیگر سامان خاکستر ہوگیا۔آگ کی وجہ معلوم نہیں ہوسکی ہے ۔