نیب میڈیا میں فعال ہے باقی کچھ نہیں کررہا-پشاورہائی کورٹ

پشاور(مانیٹرنگ ڈیسک)ہائی کورٹ کے جج جسٹس قیصر رشید نے ریمارکس میں کہا ہے کہ نیب پریس اور نیوز چینل کی حد تک بڑا فعال نظر آرہا ہے باقی کچھ نہیں کررہا۔پشاور ہائی کورٹ میں مقدمے کی سماعت کے دوران نیب پراسیکوٹر کی کمی پر عدالت نے برہمی کا اظہار کیا، اس موقع پر ڈی جی نیب خیبر پختونخوا فرمان اللہ جان عدالت میں پیش ہوئے، جسٹس قیصر رشید نے ڈی جی نیب سے استفسار کیا کہ نیب پراسیکوٹر کی کمی کیوں ہے، ہائیکورٹ میں صرف دو پراسیکوٹر ہیں جو کبھی ایک اور کبھی دوسری عدالتوں کے چکر لگا رہے ہیں۔ڈی جی نیب خیبر پختونخوا نے عدالت کو بتایا کہ چیئرمین نیب نے منظوری دی ہے جلد پراسیکوٹر تعینات کریں گے۔