آسٹریلین اوپن ٹینس میں تجربہ کار پلیئرز کا راج

میلبورن(امت نیوز) ہسپانوی شہرہ آفاق ٹینس سٹار اور عالمی نمبر دو رافیل نڈال، سوئٹزرلینڈ کے بین الاقوامی شہرت یافتہ ٹینس سٹار راجر فیڈرر، کروشیا کے مارین کلک اور سپین کے باٹیسٹا فاتحانہ آغاز کرتے ہوئے سال کے پہلے گرینڈ سلام ٹینس ٹورنامنٹ آسٹریلین اوپن مینز سنگلز دوسرے راؤنڈ میں پہنچ گئے۔ آسٹریلیا میں جاری میگا ایونٹ میں بدھ کو کھیلے گئے مینز سنگلز ایونٹ کے پہلے راؤنڈ میچز میں رافیل نڈال نے عمدہ کارکردگی کا مظاہرہ کرتے ہوئے میزبان میتھیوایبڈن کو 6-3، 6-2 اور 6-2 سے ہرا کر دوسرے راؤنڈ میں جگہ بنائی۔ جرمنی کی انجلیق کربر، ڈنمارک کی کیرولین وزنائیکی، روسی ٹین کوئین ماریہ شراپوا، جمہوریہ چیک کی پٹرا کویٹوا اور جاپان کی ناؤمی اوساکا آسٹریلین اوپن ٹینس ویمنز سنگلز دوسرے راؤنڈ میں پہنچ گئیں۔ آسٹریلیا میں جاری سال کے پہلے گرینڈ سلام ایونٹ میں بدھ کو کھیلے گئے ویمنز سنگلز پہلے راؤنڈ میچز میں جرمنی کی نامور ٹینس سٹار انجلیق کربر نے شاندار کارکردگی کا مظاہرہ کرتے ہوئے برازیل کی مایا کو سٹریٹ سیٹس میں 6-2 اور 6-3 سے شکست دیکر میگا ایونٹ کا فاتحانہ انداز میں آغاز کرتے ہوئے دوسرے راؤنڈ کے لئے کوالیفائی کرلیا۔