سیرت النبیؐ اور نعتیہ کتب پر کل پاکستان مقابلے کا اعلان

اسلام آباد (اے پی پی) وزارت مذہبی امور نے سیرت النبی اور نعتیہ کتب پر کل پاکستان مقابلے کا اعلان کیا ہے جس کے تحت سیرت کی کتب پر تحریر کی جانے والی کتابوں پر 50 ہزار روپے سے ایک لاکھ روپے تک کے تین انعامات، نعتیہ کتب پر 35ہزار سے 50ہزار روپے تک کے تین انعام، خواتین کے لیے اسلامی موضوعات پر لکھی گئی کتب پر 50ہزار سے ایک لاکھ روپے تک کے تین انعامات دیے جائیں گے۔ وزارت مذہبی امور کے ذرائع کے مطابق سیرت النبی پر ہر علاقائی زبان میں لکھی گئی کتاب پر 35ہزار روپے کا ایک انعام دیا جائے گا۔ قومی زبان میں بچوں کے لیے تحریر کردہ سیرت النبی پر کتب کے لیے 30ہزار سے 50ہزار روپے تک کے تین انعامات، عربی اور انگریزی میں سیرت پر تحریر کردہ کتب پر 40ہزار سے 75ہزار روپے تک کے تین انعامات مختص کیے گئے ہیں۔ سیرت و نعت پر رسائل یا مجلات پر 20ہزار سے 30 ہزار روپے تک کے تین نقد انعامات دیے جائیں گے۔ مقابلے میں شرکت کے لیے کتب 29مارچ 2019ء تک وزارت مذہبی امور کو بھجوانی لازمی ہوں گی۔