ٹیسٹ درجہ بندی میں کیریبین بالرز کی لمبی چھلانگیں

دبئی (امت نیوز) انٹرنیشنل کرکٹ کونسل کی تازہ ترین ٹیسٹ پلیئرز رینکنگ میں فاسٹ بائولرز کی پوزیشنز میں نمایاں بہتری آئی ہے، پیٹ کمنز نے ایک درجہ ترقی پا کر جیمز اینڈرسن سے دوسری پوزیشن چھین لی، جیسن ہولڈر 4 درجے ترقی کے ساتھ چھٹے، شینن گبرائل ایک درجہ بہتری کے بعد 11ویں اور کیمر روچ 8 سیڑھیاں چڑھ کر 12ویں نمبر پر آ گئے، یہ 23 برس بعد پہلا موقع ہے کہ تین ویسٹ انڈین فاسٹ بائولرز نے ٹاپ 12 بائولرز کی فہرست میں جگہ بنائی ہو، آخری مرتبہ 1996ء میں ویسٹ انڈیز کے چار فاسٹ بائولرز کرٹلی ایمبروز، کورٹنی والش، این بشپ اور کینی بنجامن ٹاپ 12 میں شامل تھے، مچل سٹارک کی 10 درجے ترقی کے ساتھ دوبارہ ٹاپ ٹونٹی میں واپسی ہوئی ہے، بلے بازوں میں جوروٹ 3 درجے تنزلی کے بعد آٹھویں نمبر پر چلے گئے۔ منگل کو آئی سی سی کی طرف سے جاری کردہ تازہ ترین ٹیسٹ پلیئرز رینکنگ کے تحت بلے بازوں میں ویرات کوہلی بدستور پہلے نمبر پر براجمان ہیں، کین ولیمسن دوسرے، چیتشور پوجارا تیسرے اور سٹیون سمتھ چوتھے نمبر پر موجود ہیں، سٹار انگلش بلے باز جوروٹ کی تنزلی کا سلسلہ جاری ہے ۔