پاکستان میں سُپر لیگ میچوں کیلئے تیاریاں عروج پر

لاہور (امت نیوز) پاکستان سپر لیگ فور کے آئندہ ماہ لاہور اور کراچی میں ہونے والے 8میچز کے لئے دونوں سٹیڈیم میں انتظامات مکمل کرنے کے لئے تیاریاں جاری ہیں جبکہ پاکستان میں پی ایس ایل فور کے گروپ میچز کے لیے آن لائن ٹکٹوں کی فروخت جمعرات اورجمعہ کی رات 12 بجے شروع ہوگئی، شائقین کو ہوم ڈلیوری کی بھی سہولت دی جائے گی ،کوریئر کمپنی کے مراکز سے ٹکٹ 25 فروری کو دستیاب ہوں گے ۔ لاہور میں ہونے والے تین میچز کے انتظامات کے لئے پی سی بی کی زیر نگرانی قذافی سٹیڈیم میں تیزی سے کام مکمل کیا جارہا ہے ۔ سٹیڈیم کو دلہن کی طرح سجانے کے لئے رنگ و روغن کیا جارہا ہے ۔کھلاڑیوں کے ڈریسنگ روم کے ساتھ ایک نئی دیوار کی تعمیر کی جارہی ہے ۔بلڈنگ کے تیسرے فلور پر پر انے وی آئی پی باکسز کی جگہ نئے باکسز تعمیر کردیئے گئے ہیں جبکہ سٹیڈیم کی گھاس اور وکٹوں پر بھی کام جاری ہے ۔سٹیڈیم میں موجود سی سی ٹی وی کیمروں کی ورکنگ کو بھی چیک کیا جارہا ہے ۔
٭٭٭٭٭