ایشین گیمز میںپاکستان ہاکی ٹیم کی عمدہ کارکردگی

اسلام آباد (امت نیوز)ایشین گیمز 2018 میں پاکستان ہاکی ٹیم نے عمدہ کارکردگی کا سلسلہ جاری رکھتے ہوئے اپنے دوسرے میچ میں عمان کو 0-10 کے بھاری مارجن سے شکست دے دی۔پاکستان نے میچ کے آغاز سے ہی جارحانہ انداز اپنایا اور دوسرے ہی منٹ میں محمد عمر بھٹہ نے گول اسکور کرکے پاکستان کو برتری دلا دی۔پہلے کوارٹر کے اختتام سے چند لمحے قبل اعجاز احمد نے گیند کو جال میں پہنچا کر پاکستان کی برتری کو دگنا کردیا۔تاہم حیران کن طور پر پاکستانی ٹیم دوسرے کوارٹر میں کوئی اسکور نہ کرسکی اور میچ کے پہلے ہاف کے اختتام تک گرین شرٹس کو 0-2 کی برتری حاصل تھی اور کوئی بھی یہ توقع نہیں کر رہا تھا کہ میچ کے اختتام پر اسکور 0-10 ہو گا۔تیسرے کوارٹر میں گول اسکور ہونے کا نہ ختم ہونے والا سلسلہ شروع ہو گیا۔