امریکہ میں اسکول کے قریب فائرنگ سے نوجوان ہلاک

کیلیفورنیا (این این آئی)امریکی ریاست کیلیفورنیا کے ایک اسکول کے قریب فائرنگ کا تازہ واقعہ پیش آیا جس کے نتیجے میں 16سالہ نوجوان ہلاک اور 18سالہ نوجوان شدید زخمی ہوا ہے ۔ فائرنگ کا واقعہ شمالی کیلیفورنیا کے شہر فیئرفیلڈ میں واقع فیئرفیلڈ ارمیجو ہائی اسکول میں پیش آیا جس میں دو گروہوں نے ایک دوسرے پر فائرنگ کی، واقعے کے فوری بعد دو افراد کو پولیس نے گرفتار کر لیا ہے۔پولیس حکام کے مطابق فائرنگ سے یہ محسوس ہو رہا تھا جیسے دو گروہوں میں آپس میں جنگ چھڑ گئی ہو۔فائرنگ ہونے کے بعد جیسے ہی پولیس اسکول پہنچی تو دومشکوک افراد نے وہاں سے فرار ہونے کی کوشش کی تاہم پولیس نے انہیں گرفتار کر کے اسکول کو سیل کر دیا ہے ۔ کیمپس میں کوئی بھی زخمی موجود نہیں ۔حکام نے والدین کے اپنے بچوں کو لینے کے لیے فائرنگ کے مقام کی قریبی جگہ کو مخصوص کر دیا ہے ۔ واقعہ کے حوالے سے پولیس تحقیقات کر رہی ہے۔