جے ایف 17 تھنڈر طیارےکی پولش ائیرشو میں دھوم

وارسا(امت نیوز) پاک فضائیہ کے جے ایف 17 تھنڈر طیارے نے پولش ائیر شو میں دھوم مچا دی، پولینڈ میں ہونے والے بین الاقوامی ائیر شو میں پاک فضائیہ کے شاہینوں کے کمالات دیکھ کر شائقین دم بخود رہ گئے۔ ائیر شو کے افتتاحی روز قومی پرچم کے رنگوں سے مزین JF-17 تھنڈر اور سپر مشاق طیارے نے پولینڈ کی فضاؤں میں شاندارمظاہرے کی بدولت شائقین سے دل کھول کر داد وصول کی۔ونگ کمانڈر ذیشان بریار نے مظاہرے میں ناقابلِ یقین فضائی مہارت دکھائی۔ائیر شو میں ائیر مارشل ارشد ملک اور وائس چیف آف دی ائیر سٹاف بھی موجود تھے۔فضائی عملے کی کارکردگی کو سراہتے ہوئے ان کا کہنا تھا کہ شو میں شمولیت سے پاک فضائیہ نے پاکستان کا دنیا بھر میں مثبت تاثر اجاگر کیا۔