کراچی سے تحریک لبیک قافلوں کی آج روانگی

کراچی(اسٹاف رپورٹر) تحریک لبیک کے تحت لاہور میں ’’لبیک یارسول اللہ مارچ‘‘ میں شرکت کے لیے کراچی سے قافلے آج روانہ ہوں گے۔ٹی ایل پی کراچی کے امیر علامہ رضی حسینی نے اجلاس سے خطاب کرتے ہوئے کہا ہے کہ ہالینڈ میں گستاخانہ خاکوں کی نمائش کو رکوانے کیلئے ہزاروں سرفروشوں پر مشتمل قافلے داتا دربار لاہور پر مارچ میں شرکت کے لیے منگل کو صبح سے شام 4 بجے تک روانہ ہوں گے۔اہلیان کراچی نے جس طرح تحریک لبیک کو دل کھول کر ووٹ دیئے ہیں۔اب وقت آچکا ہے کہ وہ ناموس مصطفےٰ کے تحفظ کیلئے ہالینڈ کی مصنوعات کے استعمال کا ایسا مکمل بائیکاٹ کریں کہ اس بائیکاٹ کے اثرات کو عالمی سطح پر محسوس کیا جائے۔انہوں نے کہا کہ پرامن مارچ کو صوبے اور وفاق روکنے کی غلطی نہ کریں، ورنہ تمام تر صورتحال کی ذمہ داری انتظامیہ اور حکومت پر عائد ہوگی۔