گستاخانہ خاکوں سے نفرت جنم لے گی – طالبان

پشاور(نمائندہ خصوصی)افغان طالبان نے ہالینڈ میں پیغمبراسلام نبی کریمؐ کی شان میں گستاخانہ خاکوں کی اشاعت کے حوالے سے بیان جاری کیا ہے ۔افغان طالبان کے ترجمان ذبیح اللہ کی جانب سے جاری بیان میں کہا گیا ہے کہ رپورٹیں شائع ہورہی ہیں کہ ہالینڈ میں ایک بار پھر پیغمبر نبی کریمؐ کی شان میں توہین آمیز قدم اٹھایا جارہا ہے ۔افغان طالبان دشمنانِ اسلام کے اس نوعیت کے گستاخانہ منصوبے کی پرزور الفاظ میں مذمت کرتے ہیں انھوں نے کہا کہ تمام اسلامی ممالک، اسلامی کانفرنس، عالمی ادارے اور مختلف موثر قوتیں پیغمبراسلام کے خلاف ایسی گستاخی کو روکیں اور مسلمانوں کے دلوں کو ٹھیس نہ پہنچائیں۔طالبان ترجمان نے کہا کہ اس طرح کے اعمال سے معاشروں کے درمیان نفرت جنم لیتی ہے۔ بدامنی پھیلتی ہے جو کسی طرح بھی جائز نہیں ہے۔