سیوھن سےلوٹنےوالےکرا چی کے8 افر ادحادثےمیں جاں بحق

جامشورو/ماتلی/ کراچی (نمائندہ امت /اسٹاف رپورٹر) جامشورو میں ٹرک نے سیوھن سے آنیوالی ہائی روف کچل دی، جس کے نتیجے میں کراچی کے8افراد جاں بحق اور 3 زخمی ہو گئے،جن کا تعلق ایک خاندان سے بتایا جاتا ہے۔ حب چوکی کے قریب گاڑی کی ٹکر سے لڑکی جاں بحق ،جبکہ اس کا بھائی شدید زخمی ہوگیا۔ جاتی میں میں 2نوجوان مارے گئے۔ تفصیلات کے مطابق انڈس ہائی وے پر جامشورو تھرمل پاور ہاؤس کے قریب حیدرآباد سے سیوھن گیس سلنڈروں سے بھرا ٹرک سیوھن سے آنے والی ہائی روف نمبر سی ڈبلیو 1054سے ٹکراگیا، جس کے نتیجے میں ہائی روف میں سوار 3نامعلوم افراد سمیت 8جاں بحق اور 3 زخمی ہوگئے، جنہیں فوری طور لمس اسپتال لیجایا گیا، جہاں سہولیات اور اسٹاف کی شدید کمی کے باعث زخمیوں کو سول اسپتال حیدرآباد منتقل کردیا گیا۔ ہائی روف میں سوار تمام افراد کا تعلق میمن گوٹھ کراچی سے بتایا جاتا ہے اور وہ لعل شہباز قلندر کے مزار سے واپس اپنے گھروں کی طرف لوٹ رہے تھے۔ اسپتال اور جامشورو پولیس ذرائع کے مطابق جاں بحق ہونے والوں عبدالحمید ولد ابراہیم سمیت دیگر افراد شامل ہیں، جبکہ غنی میمن ولد عیسیٰ میمن ، اظہر علی اور ایک 12سالہ شہباز زخمی ہیں۔ جاتی کے قریب تیز رفتار موٹر سائیکل اور رکشہ میں ٹکر کے نتیجے میں شہباز ابڑو اور عرس بوریو ہلاک اور نواز سمیجو، علی محمد اورسلیمان شدید زخمی ہوگئے۔ حب چوکی کے قریب تیز رفتارگاڑی نے موٹر سائیکل کو ٹکرماردی، جس کے نتیجے میں 15سالہ ستارہ دختر بدرالدین جاں بحق اور اس کا 17سالہ مشتاق زخمی ہوگیا۔