یو ایس اوپن ٹینس میں رافیل نڈال پری کوارٹر فائنل میں پہنچ گئے

نیویارک(امت نیوز) دفاعی چیمپئن رافیل نڈال، ڈومنک تھائم، کیون اینڈرسن، میلوس رائونک، ڈیل پوٹرو، جان اسنر اور بورنا کورک فتوحات برقرار رکھتے ہوئے سال کے چوتھے اور آخری گرینڈ سلام ٹینس ٹورنامنٹ یو ایس اوپن مینز سنگلز پری کوارٹر فائنل میں پہنچ گئے۔ امریکہ میں جاری میگا ایونٹ میں کھیلے گئے مینز سنگلز تیسرے رائونڈ میچز میں سٹار ہسپانوی کھلاڑی اور عالمی نمبر ایک رافیل نڈال نے عمدہ کارکردگی کا مظاہرہ کرتے ہوئے حریف روسی کھلاڑی کیرن خچانووف کو سخت مقابلے کے بعد 5-7، 7-5، 7-6(9-7)، اور 7-6 (7-3) سے ہرا کر پری کوارٹر فائنل میں جگہ بنا لی، آسٹرین کھلاڑی ڈومنک تھائم بھی تیسری آزمائش میں کامیاب رہے، انہوں نے امریکن کھلاڑی فرٹز کو شکست فاش سے دوچار کیا، جنوبی افریقن کھلاڑی کیون اینڈرسن نے حریف کینیڈین کھلاڑی ڈینس شاپووالوو کو کانٹے دار مقابلے کے بعد ہرا کر ایونٹ سے باہر کر دیا، کروشین کھلاڑی بورنا کورک نے روس کے ڈینیل مدوف کو ہرا کر پری کوارٹر فائنل تک رسائی حاصل کی، کینیڈین کھلاڑی میلوس رائونک نے سوئس کھلاڑی واورینکا کو ہرا کر ایونٹ سے باہر کر دیا۔