گاڑیوں کی ٹکر سے 2نوجوان-پاؤں پھسلنے سے فیکٹری مزدور جاں بحق

کراچی (اسٹاف رپورٹر) گاڑیوں کی ٹکر سے 2 نوجوان اور پاؤں پھسلنے سے فیکٹری کا مزدور جاں بحق ہوگیا۔ تفصیلات کے مطابق عائشہ منزل فلائی اوور پل پر جمعے و ہفتے کی درمیانی شب نامعلوم گاڑی کی ٹکر سے موٹر سائیکل سوار 20سالہ نامعلوم نوجوان جاں بحق ہو گیا۔ گلبرگ پولیس نے لاش شناخت کیلئے سرد خانے منتقل کردی ہے۔ سائٹ ایریا کے علاقے حبیب بینک چورنگی کے قریب گاڑی کی ٹکر سے22سالہ داؤد ولد آصف مسیح شدید زخمی ہو گیا، جسے فوری طور پر عباسی اسپتال منتقل کیا گیا، جہاں اس نے دوران علاج دم توڑ دیا۔ پولیس نے بتایا کہ متوفی موسیٰ کالونی کا رہائشی تھا۔ نیو کراچی صنعتی ایریا کی فیکٹری میں کام کے دوران پاؤں پھسلنے سے مزدور35سالہ ستار گر کر موقع پر جاں بحق ہو گیا۔ پولیس نے بتایا کہ متوفی کا آبائی تعلق پنجاب سے تھا۔