شاہ پور چاکر میں شوہر کے ہاتھوں قتل خاتون کی قبر کشائی

شاہپورچاکر(نامہ نگار) شاہپور چاکر کے نواحی گوٹھ دوست علی کوش میں شوہر کے ہاتھوں ایک ماہ قبل مبینہ طور پر سیاہ کاری کے الزام میں قتل کرکے دفنائی گئی 18 سالہ مقتولہ ظہوراں کوش کی سول جج شہدادپور امتیاز بھنبھرو کی موجودگی میں قبر کشائی کی گئی۔ عدالتی حکم پر پی ایم سی نوابشاہ اور شہداد پور میڈیکل انسٹیٹیوٹ کے ڈاکٹرز پر مشتمل میڈیکل بورڈ کے ڈاکٹر ولی محمد کیریو، پولیس سرجن قطب میمن، ڈاکٹر غلام سرور پیرزادہ، لیڈی ڈاکٹر فوزیہ و دیگر نے اجزا لئے۔ ایک ماہ قبل شاہپورچاکر کے نواحی گوٹھ دوست علی کوش میں ظہوراں کوش کو سیاہ کاری کے الزام میں شوہرسسر اور دیور نے مبینہ طور پر بے دردی سے قتل کر دیا تھا اور مقتولہ کے والد کو فون کرکے اس کی بیٹی کو سیاہ کاری کے الزام میں قتل کرنے کی اطلاع دیتے ہوئے بتایا کہ مقتولہ شادی سے پہلے 7 ماہ کی حاملہ تھی۔ پولیس نے مقتولہ کی ماں مسمات وڈن کوش کی مدعیت میں ظہوراں کے شوہرسسر اور دیور کے خلاف قتل کا مقدمہ داخل کر ایا تھا۔