بھارت کے تمام کھلاڑیوں کو آئوٹ کرنا چاہتا ہوں-حسن علی

لاہور(امت نیوز)قومی کرکٹ ٹیم کے مایہ ناز فاسٹ بائولرحسن علی نے کہا ہے کہ میری خواہش ہے کہ بھارت کیخلاف میچ میں تمام کھلاڑیوں کو آئوٹ کرکے اپنی کامیابی کو منانے کامخصوص سٹائل دس بار دہرائوں تاہم میچ میں ہی پتہ چلے گا کہ کیا ہوتا ہے‘ قذافی سٹیڈیم لاہور میں قومی کرکٹ ٹیم کے تربیتی کیمپ کے دوران میڈیا سے گفتگو کرتے ہوئے حسن علی نے کہا کہ ہر بائولر کی خواہش ہوتی ہے کہ وہ مخالف ٹیم کے خلاف زیادہ سے زیادہ وکٹیں لے اور اپنی ٹیم کی کامیابی میں اہم کردار ادا کرے‘میری کوشش ہوتی ہے کہ جہاں ٹیم کو ضرورت ہو وہاں پر وکٹیں حاصل کروں تاہم ایشیا کپ میں بھی کوشش ہوگی کہ تمام ٹیموں کے خلاف اچھی بائولنگ کرکے ٹیم کی جیت میں اہم کردار ادا کروں‘میرا ٹارگٹ صرف بھارت کے بلے باز نہیں بلکہ ایشیا کپ میں حصہ لینے والی تمام ٹیموں کے بلے باز ہوں گے‘انہوں نے ایک سوال کے جواب میں بتایا کہ پاکستان اور بھارت کے مابین ہونے والا گزشتہ میچ جیتنے کی وجہ سے ایشیا کپ کے میچ میں پاکستانی ٹیم کو بھارت کے خلاف نفسیاتی برتری حاصل ہوگی جبکہ بھارت کو کوہلی کی بھی خدمات حاصل نہیں ہوں گی اور ہم اس ایڈوانٹیج کا بھی فائدہ اٹھائیں گے ‘ویرات کوہلی ورلڈ کلاس اور میچ ونر کھلاڑی ہے اور وہ بھارت کو پریشر سے نکال کر جیت کی راہ کی طرف گامزن کرنے میں مہارت رکھتا ہے۔