یوتھ ایشیا کپ کیلئے قومی انڈر 19 ٹیم کا اعلان

لاہور(امت نیوز )باسط علی کی سربراہی میں جونیئر سلیکشن کمیٹی نے اے سی سی یوتھ انڈر 19ایشیا کرکٹ کپ کیلئے پندرہ رکنی قومی انڈر19کرکٹ ٹیم، پانچ ریزرو کھلاڑیوں اور ٹیم مینجمنٹ کا اعلان کردیا ،پی سی بی کو سابق تجربہ کار ٹیسٹ کرکٹر صادق محمد کا بھی خیال آگیا اور انہیں انڈر 19ٹیم کا منیجر بنادیا گیا، انڈر 19ایشیا کرکٹ کپ 28ستمبر سے سات اکتوبر تک بنگلہ دیش میں کھیلاجائے گا ،اعلان کردہ پندرہ رکنی اسکواڈ کے کپتان روحیل نذیر ہوں گے جبکہ دیگر کھلاڑیوں میں محمد محسن ،صائم ایوب،جہاں زیب سلطان ،اویز ظفر ،وقار احمد ،سعد خان ،محمد آصف ،فرخ عباس ،محمد بلال جاوید ،جنید خان ،موسی خان ،نسیم شاہ ،محمد حسنین اور ارشد اقبال شامل ہیں ،ٹیم مینجمنٹ میں صادق محمد (منیجر)،ہیڈ کوچ اعظم خان ،اسسٹنٹ کوچ محتشم رشید ،ثاقب فقیر فیلڈنگ کوچ ،محمد عثمان غنی فزیو تھراپسٹ و دیگر شامل ہیں۔