267 ارب ڈالر کی چینی درآمدات پر ٹیکس لگانے کی ٹرمپ دھمکی

واشنگٹن(خبر ایجنسیاں)امریکی صدر ڈونلڈ ٹرمپ نے چین کی 267 ارب ڈالر مالیت کی مزید درآمدی اشیا پر محصولات کی دھمکی دی ہے، جسکے بعد چین سے درآمد ہر چیز ٹیکسوں کے دائرے میں آجائے گی۔ انہوں نے نارتھ ڈکوٹا کے شہر فارگو میں میڈیا سے گفتگو میں بتایا کہ مزید 200 ارب ڈالر کی اشیا کو جلد درآمدی ٹیکس کے دائرے میں لایا جا رہا ہے، اس کے بعد 267ارب ڈالر کی اشیا کی فہرست بھی تیار ہے، جن پر مختصر نوٹس پر ٹیکس عائد کئے جا سکتے ہیں۔ صدر ٹرمپ کا یہ بیان اس 7روزہ مدت کے خاتمے کے بعد سامنے آیا ہے، جس میں200ارب کی چینی درآمدات پر نئے ٹیکسوں کیلئےعوامی رائے مانگی گئی تھی۔ وائٹ ہاؤس کے معاشی مشیر لیری کوڈلو نے کہا کہ ٹرمپ انتظامیہ مجوزہ ٹیکسوں کا فیصلہ کرنے سے پہلے عوام کی تجاویز کا جائزہ لے گی۔7 دن میں حکومت کو 6 ہزار تجاویز موصول ہوئی ہیں۔ دوسری جانب چین نے متنبہ کیا ہے کہ اگر امریکہ نے نئے ٹیکس لگائے تو جواباً مساوی مالیت کے ٹیکس لگائے جائیں گے۔ تجزیہ کاروں کا کہنا ہے کہ نئے ٹیکس نافذ ہوئے تو چین سے درآمد ہر چیز اضافی محصولات کے دائرے میں آ جا ئے گی، جس سے دونوں ملکوں کی تجارتی جنگ مزید شدت اختیار کر سکتی ہے۔