’’بھارت کیخلاف میچ جیتنے کی پوری کوشش کرینگے‘‘

دبئی(امت نیوز) قومی کرکٹ ٹیم کے کپتان سرفراز احمد نے کہا ہے کہ ایشیا کپ ایک بڑا ٹورنامنٹ ہے اور اس میں حصہ لینے والی تمام ٹیموں کے سکواڈ بہترین ہیں ،افغانستان اور ہانگ کانگ سمیت کسی بھی ٹیم کو آسان نہیں لیا جاسکتا ،کوشش ہوگی کہ پہلا میچ جیت کر ٹیم کا مومینٹم بنائیں اور اسے فائنل تک برقرار رکھیں ۔دبئی میں میڈیا سے گفتگو کرتے ہوئے انہوں نے کہاکہ ایشیا کپ سے ورلڈ کپ کی تیاریوں کا آغاز ہوگیا ہے اور ورلڈ کپ سے قبل مختلف ٹیموں کے خلاف ہونے والی سیریز سے ورلڈ کپ کی تیاری میں مزید مدد ملے گی ۔انہوں نے کہاکہ ایشیا کپ جیتنے کے لئے ہر ٹیم کو اچھی کرکٹ کھیلنی پڑے گی ۔ چیمپئنز ٹرافی ٹورنامنٹ میں ہم نے ابتدائی میچز جیت کر ٹیم کا مومینٹم بنایا تھا جو کہ فائنل تک رہا اور ٹیم ٹورنامنٹ جیت گئی اور ایسا ہی ایشیا کپ میں کریں گے ۔