ڈکیتی میں ملوث پولیس اہلکار سی سی ٹی وی کی مدد سے پکڑا گیا

کراچی(اسٹاف رپورٹر)ساحل پولیس نے ڈیفنس میں ہونے والی ڈکیتی کی واردات میں ملوث پولیس اہلکار کو گرفتار کرلیا۔سی سی ٹی وی فوٹیج کی مدد سے شناخت کے بعد پولیس نے کارروائی کرکے ڈکیت اہلکار معید خٹک کو گرفتار کر کے اسلحہ برآمد کرلیا۔پولیس نے کہا کہ ملزم آئی جی جیل کے پروٹوکول میں تعینات اور ڈیوٹی کے بعد ڈکیتی بھی کرتا تھا۔ملزم نے پولیس کو دیے گئے بیان میں کہا کہ وہ پہلے بھی ڈکیتی کے الزام میں گرفتار ہوچکا۔پولیس نے کہا کہ ملزم اہلکار کے جیل میں قید اسٹریٹ کرمنلز سے بھی رابطے تھے اور ان کے نیٹ ورک کے ذریعے ہی واردات کرتا تھا۔ملزم نے 2 ستمبر کو اپنے ساتھی زوہیب کے ساتھ مل کر خیابان غالب شاہین کراسنگ کے قریب بنگلہ نمبر 65/1میں ڈکیتی کی واردات کی تھی اور واردات کے دوران چار ہزار غیر ملکی کرنسی ، طلائی زیورات ، چین وغیرہ 2لیڈیز گھڑیاں ، اور موبائل فون لے کر فرار ہوگیا تھا۔پولیس نے مزید کہا کہ ملزم کو مدعی مقدمہ نے شناخت کرلیا ہے۔