محکمہ صحت میں کوئی سیاسی بھرتی نہیں ہوگی-ڈاکٹر عذرا پیچوہو

کراچی(بزنس رپورٹر)صوبائی وزیرِ صحت ڈاکٹر عذرا افضل پیچوہو نے کہا ہے کہ ان کے محکمے میں کوئی سیاسی بھرتی ہوئی ہے نہ ہی ہوگی۔محکمہ صحت کی خالی اسامیوں کو میرٹ پر پر کیا جائے گا۔ڈسٹرکٹ ہیلتھ آفیسرز اور میڈیکل سپرنٹڈنٹس کے لیے بھی ٹیسٹ ہوں گے، جس کا انتظام ڈاؤ یونیورسٹی کو دیا گیا ہے۔یہ بات انہوں نے وزارت سنبھالنے کے بعد ڈاؤ یونیورسٹی کے پہلے دورے کے موقع پر میڈیا سے گفتگو کرتے ہوئے کہی۔ وائس چانسلر ڈاکٹر محمد سعید قریشی، پرو وائس چانسلر پروفیسر ڈاکٹر زرناز واحد اور ہیڈآف فارنسک میڈیسن پروفیسر مکرم علی بھی موجود تھے۔انہوں نے کہا کہ ڈاؤ یونیورسٹی کی اسکل لیب کی اپ گریڈیشن سمیت دیگر منصوبوں پر کام کی رفتار تیز کی جائے گی۔انہوں مزید نے کہا کہ سول اسپتال اور ٹراما سینٹر سمیت تمام اداروں کی خالی اسامیوں کو پر کیا جائے گا۔لیڈی ایم ایل اوز کی کمی سے متعلق سوال پر انہوں نے کہا کہ سرکاری اسپتال کے میڈیکل آفیسرز (مردو خواتین) کو اختیار ہے کہ وہ میڈیکولیگل کیسز نمٹادیں۔اس لیے اب کوئی مسئلہ نہیں ہونا چاہئے۔