گینگ وار لاڈلہ گروپ کے 2ٹارگٹ کلرگرفتار

کراچی (اسٹاف رپورٹر)کلری پولیس نے لیاری گینگ وار زاہد لاڈلہ گروپ کے 2 خطرناک ٹارگٹ کلرز کو گرفتار کرکے اسلحہ اور موٹر سائیکل برآمد کرلی۔ ٹارگٹ کلرز نے 2 افراد کے قتل اور 2 خواتین کو زخمی کرنے کا اعتراف کیا ہے۔ تفصیلات کے مطابق کلری پولیس نے کھجی گلی میں کارروائی کرتے ہوئے 2 ٹارگٹ کلرز ساجد عرف چیچی اور فراز عرف چیتا کو گرفتار کرکے ان سے اسلحہ اور موٹر سائیکل برآمد کرلی۔ پولیس کا کہنا ہے کہ ملزمان نے دوران تفتیش انکشاف کیا کہ انہوں نے 21جولائی کو احمد شاہ بخاری روڈ کے قریب اپنے ساتھیوں راشد عرف چکنا، آصف، انیس اور اقبال کیساتھ فائرنگ کرکے محمد شکیل کو ہلاک کیا۔ ٹارگٹ کلرز نے 24اگست کو دبئی چوک بغدادی میں شعیب عرف کوڈو کو فائرنگ کرکے ہلاک کیاتھا۔ ملزمان نے بتایا کہ 7 جولائی کوعید گاہ لین احمد شاہ غازی روڈ کے قریب فائرنگ کرکے حنیفہ دختر شاہ جہاں اور درمحمد ولد محمد ابراہیم کو زخمی کیا، 14 جون کو گلی نمبر 7 دبئی چوک پر فائرنگ کرکے حمیرا زوجہ قادر بخش کو زخمی کیا تھا۔ ٹارگٹ کلرز کیخلاف لیاری کے مختلف تھانوں میں مقدمات درج ہیں۔ ملزمان کے دیگر ساتھیوں کی گرفتاری کیلئے چھاپے مارے جارہے ہیں۔