بفرزون میں اغوا کار قرار دیکر نوجوان کی درگت

کراچی(اسٹاف رپورٹر) بفرزون میں خواتین کو چھیڑنے پر علاقہ مکینوں نے نوجوان کو اغواکار قراردے کر درگت بنادی۔ تفصیلات کے مطابق بفرزون میں خواتین کو چھیڑنے کے الزام میں اہل محلہ نے اشرف کو پکڑ کر تشدد کا نشانہ بنانا شروع کردیا، جبکہ واقعے کی اطلاع پر مددگار 15کی گاڑی موقع پر پہنچ گئی اور نوجوان کو تحویل میں لے لیا ۔پولیس کے مطابق علاقہ مکینوں نے ابتدا میں بتایا کہ ملزم اشرف بچے کو اغوا کرنے کی کوشش کر رہا تھا ،جس پر اسے پکڑ لیا ،تاہم تفتیش میں ثابت ہو ا کہ معاملہ خواتین کو چھیڑنے کا تھا ۔ملزم کے خلاف قانونی کارروائی شروع کردی ہے۔