موچکو-فیروزآباد میں گاڑیوں کی ٹکر سےخاتون و نوجوان جاں بحق

کراچی (اسٹاف رپورٹر) مختلف علاقوں میں گاڑیوں کی ٹکر معمر خاتون اور نوجوان جاں بحق ہوگیا۔ سخی حسن سے نشے کے عادی شخص کی لاش ملی۔ تفصیلات کے مطابق موچکو کے علاقے مواچھ گوٹھ میں تیز رفتار رکشہ الٹنے سے اس میں سوار 55 سالہ شبانہ زوجہ غلام رسول موقع پر جاں بحق ہوگئی، متوفیہ بلدیہ کی رہائشی تھی۔ فیروز آباد کے علاقے نرسری اسٹاپ کے پاس نامعلوم گاڑی کی ٹکر سے 17 سالہ عمر ولد عتیق جاں بحق ہوگیا۔ تیموریہ کے علاقے نارتھ ناظم آباد سخی حسن چورنگی سے متصل ڈی سی آفس کے پاس سے 30 سالہ شخص کی لاش ملی، جسے پولیس نے قانونی کارروائی کیلئے قریبی اسپتال پہنچایا۔ پولیس کا کہنا ہے کہ متوفی نشے کا عادی تھا اور نشے کی زیادتی سے ہلاک ہوگیا۔ متوفی کے پاس سے شناخت کی کوئی چیز نہیں ملی ہے۔ پولیس نے کارروائی کے بعد لاش شناخت کیلئے سرد خانے میں رکھوادی ہے ۔