موٹر سائیکل پر سوار خاتون کی فائرنگ سے گینگ وار کارندہ ہلاک

کراچی(اسٹاف رپورٹر) جمشید کوارٹرز میں موٹر سائیکل پر سوار نامعلوم خاتون نے فائرنگ کر کے گینگ وار کارندے کو قتل کر دیا۔ پولیس نے جائے واردات سے ایک میگزین اور9خول برآمد کئے ہیں۔ تفصیلات کے مطابق جمشید کوارٹر کے علاقے بلوچ پاڑہ حق باہو ہال کے قریب کھڑے شخص پر موٹر سائیکل پر نامعلوم مرد کیساتھ آنے والی خاتون نے پستول سے اندھا دھند فائرنگ کی اور فرار ہو گئی۔ پولیس نے زخمی کو تشویشناک حالت میں اسپتال منتقل کیا، جہاں اس نے دم توڑ دیا۔ ایس ایچ او ناصر اعوان نے بتایا کہ مقتول کی شناخت 33سالہ وسیم ولد عبدالمعروف کے نام سے کی گئی جو نشتر روڈ فلمستان سینما کے قریب کا رہائشی تھا۔ انہوں نے مزید بتایا کہ مقتول کا تعلق گینگ وار گروپ سے تھا اور کچھ عرصہ قبل جیل سے رہا ہوا تھا۔ انہوں نے کہا کہ جائے واردات سے میگزین اور 9گولیاں ملی ہیں جبکہ واقعہ گینگ وار یا ذاتی دشمنی کا شاخسانہ معلوم ہو تا ہے۔