میڈیاٹاؤن ہاکس بے میں مزید 4پلاٹوں پر تعمیرات شروع

کراچی (اسٹاف رپورٹر) میڈیا ٹاؤن ہاکس بے میں تعمیراتی سرگرمیوں میں زبردست تیزی آ رہی ہے، اتوار کے روز مزید 4 پلاٹوں پر تعمیرات شروع کر دی گئیں، کے پی سی کے سینئر ممبران انیس الدین خان (B-622/3)، خورشید احمدعباسی (B-29/3A1)،محمد فاروق (B-85/3A،اور محمد عمیر (B-274/3) نے اپنے اپنے پلاٹوں پر تعمیرات کا آغاز کر دیا ہے، سینئر ممبر جاوید رشید نے بھی اپنے پلاٹ B-530/3 پر تعمیرات شروع کرنے کا اعلان کیا ہے، اس طرح اب مجموعی طور پر 9 پلاٹوں پر تعمیرات ہو رہی ہیں، جبکہ 15 سے 20 مزید پلاٹوں پر تعمیرات آئندہ ہفتے کے دوران شروع ہو جائیں گی، دریں اثناء کراچی پریس کلب کے صدر احمد خان ملک، سیکریٹری مقصود احمد یوسفی، ارکان گورننگ باڈی و پلاٹ ڈیولپمنٹ کمیٹی نے میڈیا ٹاؤن میں تعمیرات شروع کرنے والے تمام ممبران کو مبارکباد پیش کی ہے اور کہا ہے کہ کے پی سی گورننگ باڈی اپنے ممبران کے پلاٹوں پر تعمیراتی سرگرمیوں میں تیزی لانے کے لیے کوشاں ہے۔ان کا کہنا تھا کہ صوبائی وزیر بلدیات کے علاوہ ایل ڈی اے سمیت تمام متعلقہ سرکاری اداروں سے مسلسل رابطہ ہے اور میڈیا ٹاؤن میں تعمیرات کرانے والوں کو زیادہ سے زیادہ سہولتیں فراہم کرانے کی کوششیں کی جارہی ہیں تاکہ صحافیوں کے لیے ایک مثالی رہائشی سوسائٹی تعمیر کرائی جاسکے۔