بھارتی اوباشوں کا بہار میں طالبات پر حملہ- 55 زخمی

نئی دہلی(امت نیوز)بھارتی ریاست بہار میں اوباشوں نے گرلز سکول پر حملہ کرکے 55 طالبات کو زخمی کر دیا، جن میں سے 34 اسپتال منتقل کر دی گئیں۔ پولیس نے 3 ملزمان کو دھر لیا۔ بھارتی میڈیا کے مطابق واقعہ ریاستی دارالحکومت پٹنہ سے 250 کلو میٹر دور ضلع سوپال میں پیش آیا، جہاں کستوربہ گرلز اسکول کی طالبات نے مقامی منچلوں کو چھیڑ چھاڑ کرنے سے منع کیا تو انہوں نے اسکول پر حملہ کر دیا اور طالبات و اساتذہ کو تشدد کا نشانہ بنانا شروع کردیا۔ واقعے میں اساتذہ سمیت 55 طالبات زخمی ہوگئیں، جن میں سے 21 کو ابتدائی طبی امداد کے بعد گھر بھیج دیا گیا، جبکہ 34 کو اسپتال منتقل کردیاگیا ہے۔ بتایا جارہا ہے کہ کچھ منچلے اسکول کی دیوار پر نازیبا جملےلکھ کر لڑکیوں سے چھیڑ چھاڑ کرتے تھے، جس سے طالبات کافی پریشان تھیں، جب طالبات نےمخالفت کی تو منچلوں کے گھر کے افراد و دیگر ساتھی اسکول میں گھس آئے اور طالبات کی پٹائی کردی۔ پولیس نے مقدمہ درج کر کے 3 ملزمان کو دھر لیا۔