حادثات میں 5جاں بحق- خاتون نالے میں گر گئی

کراچی(اسٹاف رپورٹر) ٹریفک حادثات ودیگر واقعات میں دو خواتین ایک بچے سمیت 7افراد ہلاک ہو گئے ،تفصیلات کے مطابق ایم اے جناح روڈ عبور کرنے والی نامعلوم راہگیر خاتون کوگاڑی نے روند دیا جسے تشویشناک حالت میں سول اسپتال منتقل کیا گیاجہاں وہ زخموں کی تاب نہ لاتے ہو ئے دم توڑگئی ،ایئرپورٹ کے قریب ٹریفک حادثے میں 60 سالہ حنیف جاں بحق ہو گیا جو اسی علاقے کا رہائشی تھا ۔الآ صف اسکوائر کے قریب گاڑی کی ٹکر سےمحمد سلیم ولد افضل جاں بحق ہو گیا ورثا اسکی لاش بغیرکارروائی کے اپنے ہمراہ لے گئے ۔ لیاقت آبادسندھی ہوٹل اور بلدیہ ٹاون سیکٹر 12/Cمیں بسوں کی چھتوں سے گر کر 2افراد چل بسے جن میں سے ایک کی عمر70 اور دوسرے کی 35سال تھی۔ پولیس نے دونوں لاشیں کارروائی کے بعد سرد خانے منتقل کردیں ۔ناگن چورنگی کے قریب50سالہ گنگا زوجہ شام جی نالے میں گر گئی رضاکاروں نے اسے نکال کر اسپتال پہنچایا تاہم ڈاکٹر زنے اسکی موت کی تصدیق کردی متوفیہ اندرون سندھ کی رہائشی تھی ۔سعید آباد کے علاقے بلدیہ سیکٹر 9-F1میں تھلے کے قریب کھیلنے والے 8سالہ عطاالمصطفیٰ پر بلاک کی دیوار گر گئی جس کی زد میں آکر وہ جاںبحق ہو گیا ،پولیس نے کارروائی کے بعد لاش ورثاءکے حوالے کر دی۔