ایتھلیٹکس کے سنسنی خیز مقابلے آج سے شروع

اسلام آباد(امت نیوز)پاکستان ایتھلیٹکس فیڈریشن کے زیر اہتمام قومی یوتھ وجونیئر ایتھلیٹکس چیمپئن شپ (آج) ہفتہ سے جناح سٹیڈیم اسلام آباد میں شروع ہوگی۔ پاکستان ایتھلیٹکس فیڈریشن کے صدر میجر جنرل (ر) محمد اکرم ساہی نے بتایاکہ چیمپئن شپ کی تمام تیاریاں مکمل کرلی گئی ہیں۔ چیمپئن شپ کی میزبانی کے فرائض اسلام آباد ایتھلیٹکس ایسوسی ایشن انجام دے رہی ہے اور چیمپئن شپ میں ملک بھر سے چودہ ٹیمیں حصہ لیں گی جن میں پاکستان آرمی، پاکستان واپڈا، پاکستان ایئر فورس، پاکستان نیوی، پاکستان ریلوے ، ایچ ای سی، پنجاب، سندھ، خیبر پختونخوا، بلوچستان، اسلام آباد، آزاد جموں و کشمیر، فاٹا اور گلگت بلتستان شامل ہیں۔ چیمپئن شپ میں ملک بھر سے تین سو سے زائد لڑکے اور لڑکیاں کھلاڑی شرکت کریں گی اور چیمپئن شپ میں ہائی جمپ، ٹرپل جمپ، لونگ جمپ، ہیمر تھرو، جیولین تھرو، شارٹ پٹ، ڈسکس تھرو، 100 میٹر دوڑ، 200 میٹر دوڑ، 400 میٹر دوڑ، 800 میٹر دوڑ، 15 سر میٹر دوڑ اور 5 ہزار میٹر دوڑ، 4X100 میٹر ریلے، 4X400 میٹر ریلے، 100 رکاوٹی دوڑ، 110 میٹر رکاوٹی دوڑ اور 400 میٹر رکاوٹی دوڑ کے مقابلے ہونگے۔ چیمپئن شپ دو روز تک جاری رہے گی۔ چیمپئن شپ میں کامیابی حاصل کرنے والے کھلاڑیوں میں میڈلز اور دیگر انعامات تقسیم کئے جائیں گے۔