اوورسیزپاکستانیوں کیلئےخصوصی شناختی کارڈنائیکوپ کی شرط ختم

اسلام آباد(مانیٹرنگ ڈیسک) بیرون ملک پاکستانیوں کے لیے خصوصی شناختی کارڈ نائیکوپ کی شرط ختم کرنے کا فیصلہ کیا گیا ہے۔ وزیراعظم عمران خان کی صدارت میں اعلیٰ سطح کا اجلاس ہوا۔ اجلاس میں معاون خصوصی زلفی بخاری، نادرا ، ایف آئی اے اور وزارت ایچ آر ڈی کے حکام نے شرکت کی۔ اجلاس میں بیرون ملک پاکستانیوں کے نائیکوپ ختم کرتے ہوئے فیصلہ کیا گیا کہ بیرون ملک پاکستانی نائیکوپ کو آپشنل استعمال کرسکیں گے۔اجلاس میں فیصلہ کیا گیا کہ نادرا اور وزارتِ ہیومن ریسورس ڈویلپمنٹ کے درمیان ڈیٹا شیئرنگ کیلئے رابطہ رہے گا جب کہ نادرا ور وزارت ایچ آر ڈی کے ساتھ بیرون ملک پاکستانیوں کے ساتھ فیملی ٹری شیئر کرے گا اور ڈیٹا کو پیش نظر رکھ کر بیرون ملک پاکستانیوں کو صحت و تعلیم کی سہولیات فراہم کی جائیں گی۔امیگریشن بیورو کیلئے نادرا کی تصدیقی عمل کی فیس بھی 45 سے کم کرکے 10روپے کردی گئی ہے اور نادرا امیگریشن بیورو اور ایف آئی اے کے درمیان لنک قائم کرنے کا فیصلہ کیا گیا۔اجلاس میں بیرون ملک سے رقوم کی ترسیل پر عائد ٹیکس ختم کرنے پربھی غور کیا گیا جس کے لئے وزیراعظم نے وزارت خزانہ اور ایف بی آر سے لائحہ عمل مانگ لیا۔اس موقع پر وزیراعظم عمران خان کا کہنا تھا کہ بیرون ملک پاکستانی ہمارا اثاثہ ہیں، بیرون ملک پاکستانیوں کی جائیدادوں پر قبضہ کرنے والوں کے خلاف سخت کارروائی کی جائے، صوبائی حکومتیں اور قانون نافذ کرنے والے ادارے ان کے اہل خانہ کی حفاظت کیلئے خاطرخواہ اقدامات کریں۔سماجی رابطوں کی ویب سائٹ ٹوئٹر پروزیراعظم عمران خان نےاعلان کیا ہے کہ حکومت اوورسیز پاکستانیوں کو بینکنگ نظام کے ذریعے پیسے بھیجنے پرآمادہ کرنےکےلیےخصوصی پیکج متعارف کروائے گی۔ ان کا کہنا تھا کہ بیرون ملک سرمایہ کی ترسیل میں رکاوٹوں کو دور کرکے حکومت ترسیلاتِ زر کو 20 ارب ڈالر سے بڑھا کر کم از کم 30 ارب ڈالر تک پہنچا سکتی ہے، اس طریقے پر عمل درآمد سے ترسیلات زر 40 ارب ڈالر تک بڑھنے کے امکانات بھی ہیں۔انہوں نے مزید کہا کہ ’فلپائن کامیابی سے یہ کارنامہ سرانجام دے چکا ہے‘۔ انہوں نے اوورسیز پاکستانیوں کو وطن واپسی پر امیگریشن کے سلسلے میں پیش آنے والے مسائل کا سد باب کرنے کے لیے اقدامات کرنے کا عندیہ بھی دے دیا۔