دوسرے ٹیسٹ میں آسٹریلیا سے مقابلے کیلئے پاکستان تیار

ابوظہبی(امت نیوز)دوسرے ٹیسٹ میں آسٹریلیا سے مقابلے کیلئے پاکستان تیار ہے۔ پاکستانی ٹیم میں فخر زمان اور بالر میر حمزہ کو شامل کیا جائیگا۔ ماہرین کا کہنا ہے کہ دونوں ٹیموں میں کانٹے دار مقابلے کی توقع ہے۔جبکہ کپتان سرفراز احمد کا کہنا ہے کہ آسٹریلیا کو شکست دیکر سیریز میں کامیابی کے خواہشمند ہیں، تمام کھلاڑی بھرپور فائٹ کیلئے تیار ہیں۔ پاکستان اور آسٹریلیا کی کرکٹ ٹیموں کے درمیان دوسرا اور آخری ٹیسٹ میچ آج سے 20 اکتوبر تک ابوظہبی میں کھیلا جائیگا۔ دونوں ٹیموں کے درمیان پہلا ٹیسٹ سنسنی خیز مقابلے کے بعد ہار جیت کے فیصلے کے بغیر ختم ہوگیا تھا، پہلے ٹیسٹ میں زبردست مقابلے کے بعد اب دونوں ٹیمیں دوسرا اور آخری ٹیسٹ جیت کر سیریز اپنے نام کرنے کیلئے پر جوش دکھائی دے رہی ہیں اسلئے دونوں ٹیموں کے درمیان کانٹے دار مقابلے کی توقع کی جا رہی ہے۔