پریس کلب کا نیا کانفرنس ہال ایم ڈی اے کا تحفہ ہے- محمد سہیل

کراچی (اسٹاف رپورٹر) ملیر ڈیولپمنٹ اتھارٹی کے ایڈیشنل ڈائریکٹرجنرل محمد سہیل نے کہا ہے کہ کراچی پریس کلب کے لئے نیا کانفرنس ہال ایم ڈی اے کی جانب سے ایک تحفہ ہے،ایم ڈی اے نے ہمیشہ صحافیوں کے مسائل کے حل میں اپنا بھرپور کردار ادا کیا ہے اور آئندہ بھی صحافیوں کے مسائل کے حل کے لئے ان کا ساتھ دینگے۔ ان خیالات کا اظہار انہوں نے کراچی پریس کلب میں نئے تعمیر کئے گئے کانفرنس ہال کی افتتاحی تقریب کے موقع پر خطاب کرتے ہوئے کیا۔ انہوں نے مزید کہا کہ سندھ حکومت بہت جلد کراچی پریس کلب کے دیگر اراکین جن کو ابھی تک پلاٹ نہیں مل سکے ہیں ان اراکین کے لئے پلاٹ کی قرعہ اندازی بہت جلد کی جائے گی۔ صدر کراچی پریس کلب احمد خان ملک نے کہا کہ کراچی پریس کلب میں نئے کانفرنس ہال کی ریکارڈ مدت میں تعمیر مکمل کرائی گئی جس پر میں تمام کلب اراکین کی جانب سے ملیر ڈیولپمنٹ اتھارٹی کے ایڈیشنل ڈائریکٹر جنرل محمد سہیل اور ان کی ٹیم کا شکر گزارہوں۔ سیکریٹری مقصود احمد یوسفی نے کہا کہ ہم محمد سہیل اور کلب کے اراکین حافظ طارق محمود اور آغا خالد کہ انتہائی مشکور ہیں جن کے تعاون سے کراچی پریس کلب میں نئے کانفرنس ہال تعمیر کرایا،کراچی پریس کلب میں کانفرنس ہال کی شدید ضرورت محسوس کی جا رہی تھی۔ قبل ازیں مہمان خصوصی ملیر ڈیولپمنٹ اتھارٹی کے ایڈیشنل ڈائریکٹر جنرل محمد سہیل، سیکرٹری ارشد خان نے کراچی پریس کلب کے صدر احمدخان ملک، سیکریٹری مقصود احمد یوسیفی کے ہمراہ تختی کی نقاب کشائی کی اور ربن کاٹ کر باقاعدہ افتتاح کیا۔