ڈیرہ اسماعیل میں دہشت گردوں کی فائرنگ سے پولیس اہلکار شہید

ڈیرہ اسماعیل خان(نمائندہ امت )ظفرآبادکالونی میں نامعلوم موٹرسائیکل سواروں کی فائرنگ سے عدالت میں تعینات حوالدار شہید ہوگیا۔ بنوں اور شمالی وزیر ستان میں بم دھماکوں کے نتیجے میں6 بچے زخمی ہوگئے۔ تفصیلات کے مطابق تھانہ ڈیرہ ٹاؤن کی حدود میں 2نامعلوم موٹرسائیکل سوار ملزمان نے ڈیوٹی پرجانے والے جوڈیشل مجسٹریٹ نمبرIIکے نائب کورٹ حوالدار محمد ندیم پر محمدی مسجد واقع ظفرآباد کے قریب فائرنگ کردی، جس سے وہ موقع پر شہید ہوگیا، جبکہ ملزمان فرارہوگئے۔ اطلاع ملنے پر ڈی پی او ڈیرہ ظہوربابرآفریدی نفری کے ہمراہ پہنچ گئے اورتفتیش شروع کی۔ واقعے کے بعد علاقے میں سیکورٹی الرٹ کردی گئی۔ ادھر بنوں کے علاقے لنڈیڈاک میں 8سالہ اللہ نور باہر سے کھلونا نما بم گھر لایا جو اچانک دھماکہ سے پھٹ گیا، جس کے نتیجے میں اللہ نور سمیت گھر کے دیگر بچے زخمی ہو گئے، جنہیں اسپتال پہنچا یا گیا، دوسرا واقعہ شمالی وزیرستان کی تحصیل میر علی کے علاقے عیدک میں ہوا، جہاں درخت میں رکھا گیا، دیسی ساختہ بم نیچے کھیلتے ہوئے بچوں پر آگرا، جس کے نتیجے میں 3بچیاں حضرا ، اقرا اور انشا زخمی ہو گئیں، جنہیں مقامی اسپتال پہنچا یا گیا۔