پنکھا گرنے سے بچہ جاں بحق- گاڑیوں نے 3افراد کچل دیئے

کراچی (اسٹاف رپورٹر) کورنگی میں چھت کا پنکھا گرنے سے تین سالہ بچہ سرجانی ٹاؤن میں زہریلی چیز کھانے سے نوجوان جاں بحق ہوگیا گاڑیوں نے 3افراد کو کچل دیا۔ چھت سے گر کر مزدور ہلاک ہو گیا۔ ابراہیم حیدری کے علاقے کورنگی الیاس گوٹھ میں گھر میں چھت پر لگا پنکھا گر گیا جس کے نتیجے میں پنکھے کے نیچے بیٹھا تین سالہ علیم شدید زخمی ہوگیا جس کو فوری طور پر قریبی اسپتال پہنچایا جارہا تھا کہ اس نے راستے میں ہی دم توڑ دیا۔سرجانی ٹاؤن کے علاقے سرجانی سیکٹر 8بھینس کالونی میں زہریلی چیز کھانے سے 28سالہ عابد شخص جاں بحق ہوگیا۔ سکھن کے علاقے کسان فیکٹری کے پاس ڈمپر کی ٹکر سے4سالہ عطاءاللہ ولد مختیار علی جاں بحق ہوگیا، اطلاع ملتے ہی پولیس نے موقع پر پہنچ کر ڈرائیور اختر حسین کو گرفتار کر لیا۔ سہراب گوٹھ کے علاقے الآصف اسکوائر کے پاس نامعلوم گاڑی کی ٹکر سے سڑک عبور کرنے والا ضعیف العمر شخص جاں بحق ہوگیا۔ گڈاپ سٹی کے علاقے سپرہائی وے ٹول پلازہ کے قریب نامعلوم گاڑی کی ٹکر سے 45سالہ جیتو ولد منو ہلاک ہوگیا۔ بن قاسم کے علاقے پورٹ قاسم میں فیکٹری کے اندر کام کرنے کے دوران فیکٹری کی چھت پر پاؤں سلپ ہونے کی وجہ سے گر کر مزدور گل شیرجاں بحق ہوگیا۔ عیدگاہ کے علاقے وحید مراد چوک پر نامعلوم گاڑی کی ٹکر سے ٹریفک پولیس کا افسر 55سالہ اعظم زخمی ہوگیا۔