اسلام آباد پولیس کو مطلوب قاتل کراچی میں گرفتار

کراچی (اسٹاف رپورٹر) اسلام آباد پولیس کو مطلوب قاتل کراچی میں پکڑا گیا۔ رینجرز اور پولیس آپریشن میں ڈاکوؤں، منشیات فروشوں اور اسٹریٹ کرمنلز سمیت 15 ملزمان کو گرفتار کرلیا گیا۔ تفصیلات کے مطابق کاؤنٹر ٹیررازم ڈپارٹمنٹ نے اسلام آباد پولیس کے ہمراہ کراچی میں کارروائی کرتے ہوئے ملزم فریاد کو گرفتار کر لیا۔ ملزم نے ڈیڑھ ماہ قبل 5لاکھ روپے کیلئے فیکٹری مالک امداد کو قتل کرکے کراچی آگیا تھا اور یہاں مزدوری کر رہا تھا۔ ایک اور کارروائی میں سی ٹی ڈی نے متعدد وارداتوں میں ملوث صلاح الدین اور صبور کو گرفتار کرکے اسلحہ، موبائل فونز اور چھینی ہوئی رقم برآمد کرلی۔ رینجرز نے پاک کالونی، چاکیواڑہ، پریڈی اور اسٹیل ٹاؤن میں آپریشن کے دوران 5ملزمان حارث، عثمان، حمزہ، محمد وقاص اور زبیر شاہ کو گرفتار کرکے موبائل فونز، اسلحہ اور لوٹی گئی رقلم برآمد کرلی، اسی طرح اسٹیل ٹاؤن رینجرز کارروائی کے دوران ملزم ایاز خان عرف کانا پکڑا گیا، جو اسلحے کی غیر قانونی ترسیل سمیت جرائم کی متعدد وارداتوں میں ملوث ہے۔ سعودآباد پولیس نے منشیات فروش محمد علی کو گرفتار کرکے منشیات برآمد کرلی۔ ملیر سٹی پولیس نے مفرور ملزم بشیر مغل کو گرفتار کرلیا۔ زمان ٹاؤن پولیس نے مقابلے کے بعد زخمی ملزم سجاد اور اسکے ساتھی آصف کو گرفتار کرکے اسلحہ برآمد کرلیا۔ نیو کراچی پولیس نے 3 ملزمان زبیر، احمد اور رفیق کو گرفتار کرکے اسلحہ اور مضر صحت گٹکا برآمد کرلیا۔ قائد آباد پولیس نے 2ملزمان جاوید اور خمیز اللہ کو گرفتار کرکے اسلحہ برآمد کرلیا۔