مقابلوں میں غیر ملکی ڈکیت ہلاک – 6 پکڑے گئے

کراچی (اسٹاف رپورٹر) مختلف علاقوں میں مقابلوں کے دوران ایک غیر ملکی ڈکیت ہلاک جبکہ 5 زخمیوں سمیت 6 ڈاکوؤں کو گرفتار کرلیا گیا ۔ تفصیلات کے مطابق گلبرگ پولیس نے گزشتہ رات مقابلے کے بعدگھروں میں ڈکیتیاں کرنے والے غیر ملکی گروہ کے تین زخمی کارندوں سمیت 4کارندوں کو گرفتار کیا جن میں سے ایک زخمی حالت میں دم توڑ گیا جبکہ اسکے دیگر دو ساتھی فرار ہوگئے۔ملزمان 25 اور 26 اکتوبر کی درمیانی شب سہیل بیگ نوری ایڈووکیٹ کے گھر ڈکیتی کے بعد ایک شہری ارشد عباس سے گاڑی چھین کر فرار ہوگئے تھے، ایس ایس پی سینٹرل عارف اسلم راؤنے پریس کانفرنس میں بتایا کہ گزشتہ رات گلبرگ میں ڈاکوؤں سے مقابلہ ہوا جو کار اور موٹرسائیکل پر سوار تھے فائرنگ کے تبادلے میں تین زخمیوں عبدالولی، سرگل عرف سارئی، محمود سمیت4 ڈاکوؤں کو گرفتار کرلیاگیا ،جن میں سے محمود دوران علاج دم توڑ گیا۔انہوں نے کہا کہ ملزمان سے برآمد کار پر جعلی نمبر پلیٹ لگی ہوئی تھی ملزمان شہر کے پوش علاقوں میں ڈکیتیوں کی وارداتیں کر تےتھے ۔واردات کی سی سی ٹی وی فوٹیج بھی پولیس نے تحویل میں لے لی ہیں ، ملزمان کو فوٹیج میں بھی واضح طور پر دیکھا جا سکتا ہے، ملزمان سے وکیل کے گھر سے لوٹا ہوا سامان بھی برآمد کیا گیا ہے جبکہ مفرور ملزمان کی تلاش میں چھاپے مارے جا رہے ہیں، دریں اثنا آئی جی سید کلیم امام نے مقابلے کے دوران ڈکیتی ودیگر جرائم میں ملوث گروہ کے 4کارندوں کی گرفتاری پر ایس ایس پی اور انکی ٹیم کو شاباش دی ہےعلاوہ ازین گلشن اقبال مقابلے میں دو ملزمان ہارون اور بابر کو گرفتار کرکے اسلحہ اورلوٹا گیا سامان برآمد کرلیاگیا جبکہ سہراب گوٹھ مقابلے میں ایک ملزم زخمی حالت میں پکڑاگیا ملزم کی شناخت عبدالقدیم کے نام سے ہوئی ، جبکہ دیگر ملزم فرار ہو گئے ۔